يا ست هانم...حسنة لله

ملاحظة لا أستطيع تجاهلها و هى أن الشحاتين، مش الشحاتات، بينشنوا على الستات أو البنات عشان ياخدوا منهم فلوس!!! من يومين بالظبط و أنا راجعة من الشغل لاقيت واحد بينادى و يقول "يـــا ست هانم..." فبصيتلوا ظناً منى ان حاجة وقعت منى أو حاجة، لاقيته بكل بجاحة بيقولى "حسنة لله الله يسترك!!!" بصيت حواليا لقيت ما شاء الله رجاله تسد عين الشمس ماليا الشارع، بس برضه سألنى أنا اللى فى سن بناته على حسنة

هو جرى ايه للمواريث الشعبية بتاعت "أنا ماكلش من عرق الستات" كناية ان الراجل مش حيسيب مراته تصرف عليه و على بيته، و الا الآيه الوحيدة اللى حافظنها [ الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنفَقُوا مِنْ أَمْوَالِهِمْ ]( النساء : 34 ) و طبعاً بينسوا جزء الآية اللى بالأحمر!!! و قال ايه كل الناس تقول "ظل راجل و لا ظل حيطة" طب بأمارة ايه؟!؟! على الأقل انا مش متوقعة الحيطة تحمينى و لا تصرف على البيت، لكن مش اى راجل يبقى أحسن من ظل الحيطة!! بيقولوا ما هو البنات بتشتغل و واخدة فرص الشغل كلها، أنا بقى بقول اذا اردت ان تطاع فأمر بما يستطاع، يعنى مش معقول ييجى عريس يقول انا فى اول حياتى فمش حدفع لا مهر ولا شبكة و لا حفرش بيت، بس عايزك تقعدى فى البيت تربى العيال و خلاص.  يعنى مش قادر يصرف على نفسه و على البنت اللى حيتجوزها و بس، لا و عايز يقعدها من الشغل و تجيب عيال، طب حتصرف عليهم منين...حاجة تجنن

أنا مش بقول ان ما بقاش فى رجالة كويسين، بس مع الأسف بقوا عملة نادرة و مهددين بالإنقراض!  فى أخر الكلام أحب أحيى الرجالة اللى بجد، و للرجالة الثانية: ربنا يكفينا شرّكم